ನೆಲ್ಯಾಡಿ: ಹವಾಮಾನ ಆಧಾರಿತ ಬೆಳೆ ವಿಮೆಗಾಗಿ ಬರೋಬ್ಬರಿ 1.12 ಕೋಟಿ ರೂಪಾಯಿ ಪ್ರೀಮಿಯಂ ಪಾವತಿಸಿದ್ದರೂ, ನೆಲ್ಯಾಡಿ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರಿ ಸಂಘದ ವ್ಯಾಪ್ತಿಯ 2,152 ರೈತರ ಖಾತೆಗಳಿಗೆ ಈವರೆಗೂ ವಿಮಾ ಪರಿಹಾರದ ಮೊತ್ತ ಜಮೆಯಾಗಿಲ್ಲ. ಇತ್ತೀಚೆಗೆ ಬಿಡುಗಡೆಯಾದ ಬೆಳೆ ವಿಮೆ ಪಟ್ಟಿಯಲ್ಲಿ ರೈತರಿಗೆ ದೊರೆಯಬೇಕಾದ ಪರಿಹಾರದ ಮೊತ್ತದ ಎದುರು ‘ಶೂನ್ಯ’ ಎಂದು ನಮೂದಿಸಲಾಗಿದ್ದು, ಕೃಷಿಕರಲ್ಲಿ ತೀವ್ರ ಆಕ್ರೋಶ ಹಾಗೂ ಆತಂಕ ಮೂಡಿಸಿದೆ.
ಕಳೆದ ಬಾರಿಯೂ ತೃಪ್ತಿಕರವಾದ ಬೆಳೆ ವಿಮೆ ದೊರೆಯದೆ ನಿರಾಸೆ ಅನುಭವಿಸಿದ್ದ ಈ ಭಾಗದ ರೈತರಿಗೆ, ಈ ಬಾರಿಯೂ ಪರಿಹಾರ ಸಿಗದಿರುವುದು ಗಾಯದ ಮೇಲೆ ಎಳೆ ಎಳೆದಂತಾಗಿದೆ. ನೆಲ್ಯಾಡಿ, ಕೌಕ್ರಾಡಿ, ಗೋಳಿತೊಟ್ಟು, ಆಲಂತಾಯ, ಕೊಣಾಲು, ಇಚಿಲಂಪಾಡಿ ಹಾಗೂ ಶಿರಾಡಿ ಸೇರಿದಂತೆ ಒಟ್ಟು 7 ಕಂದಾಯ ಗ್ರಾಮಗಳ 2,152 ರೈತ ಸದಸ್ಯರು 2026ನೇ ಸಾಲಿನ ವಿಮಾ ಕಂತನ್ನು ಪಾವತಿಸಿದ್ದರು.
ಸಚಿವರಿಗೆ ಮನವಿ, ಪ್ರತಿಭಟನೆಯ ಎಚ್ಚರಿಕೆ: ಹೆಚ್ಚುತ್ತಿರುವ ಕೃಷಿ ವೆಚ್ಚ ಮತ್ತು ಹವಾಮಾನ ವೈಪರೀತ್ಯದಿಂದಾಗಿ ಬೆಳೆ ನಷ್ಟದ ಭೀತಿಯಲ್ಲಿರುವ ರೈತರಿಗೆ ವಿಮೆ ಸೂಕ್ತ ಆಸರೆಯಾಗಬೇಕಿತ್ತು. ಆದರೆ ವಿಮಾ ಕಂಪನಿಯ ಈ ಧೋರಣೆಯನ್ನು ಖಂಡಿಸಿ, ನೆಲ್ಯಾಡಿ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರಿ ಸಂಘದ ಅಧ್ಯಕ್ಷ ಬಾಲಕೃಷ್ಣ ಬಾಣಜಾಲು, ಉಪಾಧ್ಯಕ್ಷ ರವಿಚಂದ್ರ ಹೊಸವಕ್ಲು ಹಾಗೂ ನಿರ್ದೇಶಕಿ ಉಷಾ ಅಂಚನ್‌ ನೇತೃತ್ವದ ನಿಯೋಗವು ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವರನ್ನು ಭೇಟಿ ಮಾಡಿ ಮನವಿ ಸಲ್ಲಿಸಿದೆ.
ವಿಮಾ ಪರಿಹಾರ ವಿಳಂಬ ಹಾಗೂ ‘ಶೂನ್ಯ’ ಪರಿಹಾರದ ಬಗ್ಗೆ ಸಮಗ್ರ ಪರಿಶೀಲನೆ ನಡೆಸಿ, ರೈತರ ಖಾತೆಗಳಿಗೆ ಅರ್ಹ ವಿಮಾ ಮೊತ್ತವನ್ನು ತಕ್ಷಣವೇ ಜಮೆ ಮಾಡಲು ಕ್ರಮ ಕೈಗೊಳ್ಳಬೇಕೆಂದು ಆಗ್ರಹಿಸಲಾಗಿದೆ. ಅಷ್ಟೇ ಅಲ್ಲದೆ, ಈ ವಿಷಯವನ್ನು ರಾಜ್ಯಮಟ್ಟದಲ್ಲಿ ಗಮನಕ್ಕೆ ತರಲು ತೋಟಗಾರಿಕೆ ಇಲಾಖೆ ಸಚಿವರನ್ನೂ ಭೇಟಿಯಾಗಲು ಸಂಘದ ನಿಯೋಗ ನಿರ್ಧರಿಸಿದ್ದು, ಶೀಘ್ರ ಪರಿಹಾರ ಸಿಗದಿದ್ದರೆ ಹೋರಾಟ ರೂಪಿಸುವುದಾಗಿ ಎಚ್ಚರಿಸಿದೆ.
