ಬೆಂಗಳೂರು: ಗೃಹ ಬಳಕೆಗಾಗಿ ಜಲಮಂಡಳಿ ಪೂರೈಸುವ ನೀರಿನ ಶುಲ್ಕದ ಮೇಲೆ ಫ್ಲ್ಯಾಟ್‌ ಖರೀದಿದಾರರಿಂದ ಜಿಎಸ್‌ಟಿ ವಸೂಲಿ ಮಾಡುವಂತಿಲ್ಲ ಎಂದು ಕರ್ನಾಟಕ ರಿಯಲ್‌ ಎಸ್ಟೇಟ್‌ ನಿಯಂತ್ರಣ ಪ್ರಾಧಿಕಾರ (ಕೆ-ರೇರಾ) ಮಹತ್ವದ ಆದೇಶ ನೀಡಿದೆ. ಅಲ್ಲದೆ, ಸಮರ್ಪಕ ದಾಖಲೆಗಳಿಲ್ಲದೆ 600ಕ್ಕೂ ಹೆಚ್ಚು ದಿನಗಳ ವಿಳಂಬ ಪಾವತಿ ಬಡ್ಡಿ ವಿಧಿಸಿರುವುದನ್ನೂ ಪ್ರಾಧಿಕಾರ ಪ್ರಶ್ನಿಸಿದ್ದು, ಹೆಚ್ಚುವರಿ ಶುಲ್ಕಗಳನ್ನು ಪರಿಶೀಲಿಸಿ ಲೆಕ್ಕಪತ್ರದಲ್ಲಿ ತಿದ್ದುಪಡಿ ಮಾಡುವಂತೆ ಬಿಲ್ಡರ್‌ಗೆ ನಿರ್ದೇಶಿಸಿದೆ.
ಕೆಂಗೇರಿಯ ‘ಕಾಸಾ ಗ್ರ್ಯಾಂಡ್‌ ಅಕ್ವೀನ್‌’ ವಸತಿ ಯೋಜನೆಯ ಫ್ಲ್ಯಾಟ್‌ ಖರೀದಿದಾರರಾದ ಸ್ನೇಹಾ ವೆಂಕಟೇಶ್‌ ಸಲ್ಲಿಸಿದ್ದ ದೂರಿನ ವಿಚಾರಣೆ ನಡೆಸಿದ ಕೆ-ರೇರಾ ಅಧ್ಯಕ್ಷ ರಾಕೇಶ್‌ ಸಿಂಗ್‌ ಅವರಿದ್ದ ಪೀಠ ಈ ಆದೇಶ ನೀಡಿದೆ. ಕಾಸಾ ಗ್ರ್ಯಾಂಡ್‌ ಗಾರ್ಡನ್‌ ಸಿಟಿ ಬಿಲ್ಡರ್ಸ್‌ ಪ್ರೈವೇಟ್‌ ಲಿಮಿಟೆಡ್‌ ಸಂಸ್ಥೆಗೆ ಈ ನಿರ್ದೇಶನ ನೀಡಲಾಗಿದೆ.
ಗೃಹ ಬಳಕೆಯ ನೀರಿಗೆ ಜಿಎಸ್‌ಟಿ ಅನ್ವಯಿಸುವುದಿಲ್ಲ
ಸಾರ್ವಜನಿಕ ಪ್ರಾಧಿಕಾರವು ಗೃಹ ಬಳಕೆಗಾಗಿ ಪೂರೈಸುವ ನೀರಿಗೆ ಜಿಎಸ್‌ಟಿ ವಿಧಿಸುವುದಕ್ಕೆ ಅವಕಾಶವಿಲ್ಲ ಎಂಬ ಅಂಶವನ್ನು ಕೆ-ರೇರಾ ತನ್ನ ಆದೇಶದಲ್ಲಿ ಸ್ಪಷ್ಟಪಡಿಸಿದೆ. ವಾಣಿಜ್ಯ ಉದ್ದೇಶದ ನೀರು ಪೂರೈಕೆಗೆ ಅನ್ವಯಿಸುವ ತೆರಿಗೆ ನಿಯಮಗಳು ಮತ್ತು ಗೃಹ ಬಳಕೆಯ ನೀರಿನ ಪೂರೈಕೆಯ ನಿಯಮಗಳನ್ನು ಪ್ರತ್ಯೇಕವಾಗಿ ಪರಿಗಣಿಸಬೇಕಾಗಿದೆ ಎಂದು ಆದೇಶದಲ್ಲಿ ತಿಳಿಸಲಾಗಿದೆ.
ಜಲಮಂಡಳಿ ನೀರಿನ ಶುಲ್ಕದ ಮೇಲೆ ಹೆಚ್ಚುವರಿಯಾಗಿ ಶೇ.18ರಷ್ಟು ಜಿಎಸ್‌ಟಿ ವಿಧಿಸಿ ವಸೂಲಿ ಮಾಡಿರುವುದನ್ನು ಸಮರ್ಥಿಸಲಾಗದು ಎಂದು ಪ್ರಾಧಿಕಾರ ಅಭಿಪ್ರಾಯಪಟ್ಟಿದೆ. ಹೀಗಾಗಿ, ನೀರಿನ ಶುಲ್ಕದ ಮೇಲಿನ ಜಿಎಸ್‌ಟಿ ಮೊತ್ತವನ್ನು ರದ್ದುಪಡಿಸಿ, ಪಾವತಿ ಬೇಡಿಕೆ ಹಾಗೂ ಲೆಕ್ಕಪತ್ರಗಳನ್ನು ಸರಿಪಡಿಸುವಂತೆ ಬಿಲ್ಡರ್‌ಗೆ ಸೂಚಿಸಿದೆ.
600ಕ್ಕೂ ಹೆಚ್ಚು ದಿನಗಳ ವಿಳಂಬ ಬಡ್ಡಿಗೂ ಆಕ್ಷೇಪ
ನೀರಿನ ಶುಲ್ಕದ ಜೊತೆಗೆ ವಿಳಂಬ ಪಾವತಿ ಬಡ್ಡಿ ವಿಧಿಸಿರುವುದೂ ಪ್ರಕರಣದ ಪ್ರಮುಖ ಅಂಶವಾಗಿದೆ. 2024ರ ಫೆಬ್ರವರಿ 11ರಿಂದ 600ಕ್ಕೂ ಹೆಚ್ಚು ದಿನಗಳ ಅವಧಿಗೆ ವಿಳಂಬ ಬಡ್ಡಿ ವಿಧಿಸಲಾಗಿದೆ ಎಂದು ಖರೀದಿದಾರರು ದೂರಿನಲ್ಲಿ ಆರೋಪಿಸಿದ್ದರು. ಆದರೆ, ಈ ಅವಧಿಯಲ್ಲಿ ಹಣ ಬಾಕಿ ಉಳಿದಿತ್ತು ಎಂಬುದನ್ನು ದೃಢಪಡಿಸುವ ಇ-ಮೇಲ್‌, ನೋಟಿಸ್‌ ಅಥವಾ ಸಂದೇಶಗಳನ್ನು ಬಿಲ್ಡರ್‌ ನೀಡಿರಲಿಲ್ಲ ಎಂಬುದು ಅವರ ಆಕ್ಷೇಪವಾಗಿತ್ತು.
ದೂರುದಾರರು ಪಾವತಿ ಬೇಡಿಕೆ ಬಂದಾಗಲೆಲ್ಲ ನಿಗದಿತ ಮೊತ್ತವನ್ನು ಪಾವತಿಸಿರುವುದು ರಸೀದಿಗಳಿಂದ ದೃಢಪಟ್ಟಿದೆ. 600ಕ್ಕೂ ಹೆಚ್ಚು ದಿನಗಳ ಕಾಲ ಪಾವತಿ ವಿಳಂಬವಾಗಿದೆ ಎಂಬ ಆರೋಪವನ್ನು ಸಾಬೀತುಪಡಿಸುವ ಸಮರ್ಪಕ ದಾಖಲೆಗಳನ್ನು ಬಿಲ್ಡರ್‌ ಸಲ್ಲಿಸಿಲ್ಲ ಎಂದು ಕೆ-ರೇರಾ ಗಮನಿಸಿದೆ. ಈ ಹಿನ್ನೆಲೆಯಲ್ಲಿ ದಾಖಲೆಗಳಿಲ್ಲದ ವಿಳಂಬ ಬಡ್ಡಿ ವಿಧಿಸಿರುವುದನ್ನು ಸಮರ್ಥಿಸಲಾಗದು ಎಂದು ಪ್ರಾಧಿಕಾರ ಹೇಳಿದೆ.
ಫ್ಲ್ಯಾಟ್‌ ಹಸ್ತಾಂತರದವರೆಗೆ ಬಿಲ್ಡರ್‌ ಹೊಣೆ
ರಿಯಲ್‌ ಎಸ್ಟೇಟ್‌ (ನಿಯಂತ್ರಣ ಮತ್ತು ಅಭಿವೃದ್ಧಿ) ಕಾಯಿದೆಯ ಸೆಕ್ಷನ್‌ 11(3) ಮತ್ತು 11(4)ರ ಅನ್ವಯ, ಫ್ಲ್ಯಾಟ್‌ನ ಭೌತಿಕ ಸ್ವಾಧೀನವನ್ನು ಖರೀದಿದಾರರಿಗೆ ಹಸ್ತಾಂತರಿಸುವವರೆಗೆ ಯೋಜನೆಗೆ ಸಂಬಂಧಿಸಿದ ನಿರ್ದಿಷ್ಟ ಹೆಚ್ಚುವರಿ ವೆಚ್ಚಗಳನ್ನು ಭರಿಸುವ ಹೊಣೆ ಪ್ರವರ್ತಕರ ಮೇಲಿದೆ ಎಂದು ಕೆ-ರೇರಾ ತಿಳಿಸಿದೆ.
ನಗರ ಸ್ಥಳೀಯ ಸಂಸ್ಥೆಗಳ ತೆರಿಗೆಗಳು, ನೀರು, ವಿದ್ಯುತ್‌ ಮತ್ತು ನಿರ್ವಹಣಾ ಶುಲ್ಕ ಸೇರಿದಂತೆ ಸಂಬಂಧಿತ ಸಕ್ಷಮ ಪ್ರಾಧಿಕಾರಗಳಿಗೆ ಪಾವತಿಸಬೇಕಾದ ಮೊತ್ತಗಳ ವಿಚಾರದಲ್ಲಿ ಅನ್ವಯಿಸುವ ಕಾನೂನು ಮತ್ತು ಒಪ್ಪಂದದ ಷರತ್ತುಗಳನ್ನು ಪಾಲಿಸಬೇಕು. ಈ ಪ್ರಕರಣದಲ್ಲಿ ಜಲಮಂಡಳಿ ನೀರಿನ ಶುಲ್ಕದ ಮೇಲೆ ಜಿಎಸ್‌ಟಿ ಹಾಗೂ ಸೂಕ್ತ ದಾಖಲೆಗಳಿಲ್ಲದ ವಿಳಂಬ ಬಡ್ಡಿ ವಿಧಿಸಿರುವುದು ಸಮರ್ಥನೀಯವಲ್ಲ ಎಂದು ಪ್ರಾಧಿಕಾರ ಅಭಿಪ್ರಾಯಪಟ್ಟಿದೆ.
ಪ್ರಕರಣದ ಹಿನ್ನೆಲೆ
ಬೆಂಗಳೂರು ದಕ್ಷಿಣ ಭಾಗದ ಕೆಂಗೇರಿಯ ಸರ್ವೆ ನಂಬರ್‌ 84/4ರಲ್ಲಿ ಅಭಿವೃದ್ಧಿಪಡಿಸಲಾಗುತ್ತಿರುವ ಕಾಸಾ ಗ್ರ್ಯಾಂಡ್‌ ಅಕ್ವೀನ್‌ ಯೋಜನೆಯ ಸಿ-703 ಸಂಖ್ಯೆಯ ಫ್ಲ್ಯಾಟ್‌ ಅನ್ನು ಸ್ನೇಹಾ ವೆಂಕಟೇಶ್‌ ಕಾಯ್ದಿರಿಸಿದ್ದರು. 2024ರ ಜನವರಿ 23ರಂದು ಫ್ಲ್ಯಾಟ್‌ ಖರೀದಿಗೆ ₹68,41,932 ಮೊತ್ತದ ಮಾರಾಟ ಒಪ್ಪಂದ ಮಾಡಿಕೊಳ್ಳಲಾಗಿತ್ತು.
2025ರ ನವೆಂಬರ್‌ 4ರಂದು ಬಿಲ್ಡರ್‌ ಕಳುಹಿಸಿದ ಖಾತೆ ವಿವರದಲ್ಲಿ ಜಲಮಂಡಳಿ ಶುಲ್ಕವನ್ನು ಸೇರಿಸಿ, ಅದರ ಮೇಲೆ ಶೇ.18ರಷ್ಟು ಜಿಎಸ್‌ಟಿ ವಿಧಿಸಲಾಗಿತ್ತು ಎಂದು ದೂರುದಾರರು ಆರೋಪಿಸಿದ್ದರು. ಅಲ್ಲದೆ, ಜಲಮಂಡಳಿ ಶುಲ್ಕದ ಜೊತೆಗೆ ₹1,18,487 ಮೊತ್ತದ ಇತರ ಶುಲ್ಕಗಳನ್ನು ವಿಧಿಸಿರುವ ಬಗ್ಗೆಯೂ ಅವರು ಆಕ್ಷೇಪ ವ್ಯಕ್ತಪಡಿಸಿದ್ದರು.
ನೀರಿನ ಶುಲ್ಕದ ಮೇಲೆ ಜಿಎಸ್‌ಟಿ ವಿಧಿಸಿರುವುದಕ್ಕೆ ವಿವರಣೆ ಕೇಳಿದರೂ ಬಿಲ್ಡರ್‌ ಸಮರ್ಪಕ ಉತ್ತರ ನೀಡಿಲ್ಲ. ನಿರ್ಮಾಣದ ಅಗತ್ಯ ಹಂತ ಪೂರ್ಣಗೊಳ್ಳದಿದ್ದರೂ ವಿಳಂಬ ಪಾವತಿ ಬಡ್ಡಿ ವಿಧಿಸಲಾಗಿದೆ ಎಂಬುದು ದೂರುದಾರರ ವಾದವಾಗಿತ್ತು.
ಬಿಲ್ಡರ್‌ ಸಮರ್ಥನೆ
ದೂರುದಾರರ ಆರೋಪಗಳನ್ನು ಬಿಲ್ಡರ್‌ ಸಂಸ್ಥೆ ತಳ್ಳಿಹಾಕಿತ್ತು. ಫ್ಲ್ಯಾಟ್‌ನ ಮಾರಾಟ ಬೆಲೆಯನ್ನು ನಿಗದಿತ ಮತ್ತು ಎಲ್ಲವನ್ನೂ ಒಳಗೊಂಡ ಮೊತ್ತವಾಗಿ ಒಪ್ಪಿಕೊಳ್ಳಲಾಗಿತ್ತು. ಜಿಎಸ್‌ಟಿಯ ಅಂಶವೂ ಒಪ್ಪಂದದ ಮೊತ್ತದ ಭಾಗವಾಗಿದೆ ಎಂದು ಸಂಸ್ಥೆ ವಾದಿಸಿತ್ತು. ಆದರೆ, ಲಭ್ಯ ದಾಖಲೆಗಳು ಮತ್ತು ವಾದ-ಪ್ರತಿವಾದಗಳನ್ನು ಪರಿಶೀಲಿಸಿದ ಕೆ-ರೇರಾ, ಜಲಮಂಡಳಿ ಶುಲ್ಕದ ಮೇಲಿನ ಜಿಎಸ್‌ಟಿ ಹಾಗೂ ದಾಖಲೆಗಳಿಲ್ಲದ ವಿಳಂಬ ಬಡ್ಡಿ ವಸೂಲಿಗೆ ಆಕ್ಷೇಪ ವ್ಯಕ್ತಪಡಿಸಿದೆ.
ಈ ಆದೇಶವು ಮನೆ ಖರೀದಿದಾರರಿಗೆ ವಿಧಿಸುವ ಹೆಚ್ಚುವರಿ ಶುಲ್ಕಗಳ ಪಾರದರ್ಶಕತೆ, ತೆರಿಗೆ ವಿಧಿಸುವ ಕಾನೂನುಬದ್ಧತೆ ಮತ್ತು ಪಾವತಿ ವಿಳಂಬದ ಆರೋಪಗಳಿಗೆ ಸಮರ್ಪಕ ದಾಖಲೆಗಳ ಅಗತ್ಯವನ್ನು ಮತ್ತೊಮ್ಮೆ ಎತ್ತಿ ತೋರಿಸಿದೆ.
